Deputeti i Lëvizjes Vetëvendosje, Enver Dugolli, thotë se mosvotimi i marrëveshjeve ndërkombëtare nga deputetët opozitarë e dëmtojnë së pari qytetarin e Kosovës.
Dugolli, thotë se marrëveshjet ndërkombëtare sjellin projekte zhvillimore në të mirë të jetës së qytetarëve.
“Mosvotimi i marrëveshjeve ndërkombëtare, të cilat janë goxha shumë tani e që janë në radhë duke pritur për t’i kaluar e dëmtojnë shumë buxhetin e Kosovës, e dëmtojnë në radhë të parë qytetarin e Kosovës, për shkak që të gjitha këto janë projekte, të cilat sjellin të mira për jetën e qytetarëve për projekte zhvillimore e kështu me radhë”, tha ai në emisionin “Info Nata” në Tëvë1.
Ai tha një pjesë nga marrëveshjet ndërkombëtare janë grante, për të cilat qeveria nuk është e nevojshme t’i kthen.
“Një pjesë e tyre janë edhe grante, për të cilat Qeveria e Kosovës nuk është e nevojshme t’i kthen. Janë projekte edhe kredi të buta, të cilat janë të favorshme shumë edhe të nevojshme shumë për qytetarët e Kosovës” deklaroi deputeti nga mazhoranca.
Tutje, Dugolli theksoi si mosvotimi i tyre dëmton seriozitetin e shtetit para ndërkombëtare.
“Mosvotimi i tyre e dëmton pra qytetarin e Kosovës, e dëmton seriozitetin dhe paraqitjen e shtetit të Kosovës me ndërkombëtarët për shkak se të gjitha këto marrëveshje janë negociuar përmes ministrave të linjës e agjencioneve të ndryshme zhvillimore. Prandaj, mosvotimi i tyre është paksa i habitshëm dhe i çuditshëm, sepse po ndodhë për herë të parë në Republikën e Kosovës”, shtoi ai./teve1.info/
