Bashkimi kanë nisur edicionin 2023/24 në mënyrën më të mirë të mundshme. Bashkimi, të mërkurën mbrëma ka triumfuar në turneun e Superkupës së Kosovës, të mbajtur në Prizren. Në finale, Bashkimi triumfoi ndaj skuadrës së Prishtinës, të cilën e mposhti me shifrat 57:49 në palestrën “Sezai Surroi” në Prizren.
Me këtë triumf, Bashkimi mbrojti trofeun e Superkupës që e fitoi edicionin e shkuar, në të cilin rrëmbeu edhe kupën e titullin e Kosovës. Për Bashkimin, kjo është hera e katërt që e fiton këtë trofe. Ndeshja finale ishte e barabartë, me të dyja ekipet që patën gabime të shumta dhe shënuan pak pikë në krahasim me ndeshjet gjysmëfinale. Prishtina në gjysmëfinale triumfoi ndaj Penzës (68:56), ndërsa Bashkimi ishte më i mirë se Trepça (90:53). Prishtina e fitoi çerekun e parë (16:13) dhe në pushim shkoi me epërsinë e tri pikëve, pasi periudha e dytë u mbyll me shifrat 9:9. Bashkimi ishte për një nuancë më i mirë në dy çerekët e fundit për ta siguruar fitoren ndaj Prishtinës.
Çerekun e tretë e fitoi me 5 pikë epërsi (16:11) ndërsa të fundit me rezultatin 19:13 për ta nisur edicionin e ri me trofe. Sarah Mgbeike ishte më e dalluara te Bashkimi me 20 pikë e 19 kërcime. Me lojë të mirë, u veçuan edhe Analyss Benally që shtoi 13 pikë e Arbnore Perquku me 11 pikë e 7 asistime. Te Prishtina, Asianahe Johnson pati 23 pikë derisa Malvina Haziri shtoi 12 sosh por që nuk ishin të mjaftueshme për ta evituar humbjen. Trofeun e Superkupës për Bashkimin e pranoi kapitenia Aulona Muhadri, ndërsa MVP u zgjodh Sarah Mgbeike.
