Kryetari i Asociacionit të Komunave të Kosovës, Sazan Ibrahimi, tha se dallimi i buxhetit në nivelin qendror me atë lokal në Kosovë ka një dallim të madh, raporton teve1.info
Ibrahimi tha se edhe kur rritet buxheti i komunave nga viti në vit, kjo ndodh për shkak të rritjes së buxhetit të përgjithshëm të Republikës së Kosovës, por sipas tij përqindja është e njëjtë që ndahet nga niveli qendror për atë lokal.
“Buxheti nëpër komuna shihet në investime kapitale dhe mallra dhe shërbime sepse mjetet financiare të cilat shkojnë për paga nga niveli qendror te zyrtarët publik ato nuk shihen si para por ato shihen në investime kapitale.
Kryetari i Asociacionit vazhdimisht ka kërkuar që të kemi bashkëpunim të sinqertë, një koordinim të mirëfilltë sepse jeta zhvillohet në nivelin lokal dhe pa përkrahjen e Qeverisë sa i përket investimeve kapitale edhe jeta e qytetarit nuk mund të ndryshoj.
Më duhet të theksoj se mbi 75 për qind e buxhetit total të Republikës së Kosovës mbetet në nivelin qendror, kurse rreth 25 deri 25.7 për qind shkon në nivelin lokal dhe kjo është diskrepancë jashtëzakonisht e madhe. Përkundër angazhimit të komunave dhe Asociacionit të Komunave të Kosovës si përfaqësues i autoriteteve lokale në Republikën e Kosovë, kjo përqindje e cila shkon nëpër komuna nuk është duke u ndryshuar në përqindje. Dmth ndoshta mjetet monetare janë duke u rritur me miliona, por këto rriten si rezultat e rritjes së buxhetit të Kosovës, por ne po kërkojmë rritja të jetë me përqindje. Shembull në vitin 2021 përqindja është 21 për qind për Komuna, kurse për vitin 2024 janë ndarë 22.6 për qind”, u shpreh Ibrahimi.
Sipas tij, për komunat me interes vital është që mjetet të shkojnë nga niveli qendror për investim kapitale dhe kërkesa tjetër sipas tij është që themelimi i grantit të katërt për komuna ku tha se janë mbi 100 milionë euro.
Megjithatë, sa i përket kësaj pike, Ibrahimi tha se as të hënën në takim me kryeministrin e Kosovës, Albin Kurti, udhëheqësit e Komunave nuk morën përgjigje.
