Ministrat e Jashtëm të Bashkimit Evropian janë duke zhvilluar një takim në Kiev, si shenjë mbështetjeje për Ukrainën, ka thënë kryediplomati i bllokut evropian, Josep Borell të hënën.
Tashmë janë bërë 19 muaj prej kur Rusia e ka nisur luftën në Ukrainë.
“Po mbledh sot ministrat e Jashtëm të BE-së në Kiev, për herë të parë ndonjëherë të 27 ministrat takohen jashtë BE-së”, ka thënë Borell në X – platformë e njohur më parë si Twitter.
“E ardhmja e Ukrainës është brenda BE-së”, ka thënë ai.
Ministri i Jashtëm ukrainas Dmytro Kuleba, ka thënë se mesazhi i takimit është që BE-ja po zgjerohet nëpër Ukrainë dhe se ukrainasit janë shumë mirënjohës.
“Ky takim historik” është mbajtur jashtë kufijve aktualë të BE-së, por brenda kufijve të BE-së në të ardhmen.
Ky takim nuk është bërë publik paraprakisht për çështje sigurie.
Një prej temave në agjendën e takimit është propozimi i Borrellit për të bërë përkushtime për ndihmën ushtarake që duhet ndarë për Ukrainën.
Borrell dëshiron t’i ndajë 5 miliardë euro si ndihmë vjetore për Ukrainën në periudhën 2024-2027, ndonëse këtë vendim ministrat nuk pritet ta marrin në Kiev.
Presidenti rus, Vladimir Putin e quan luftën si “operacion special ushtarak” për të çmilitarizuar Ukrainën.
Perëndimi është përgjigjur ndaj Rusisë, duke goditur ekonominë e këtij shteti me sanksione të ashpra.
Si pasojë e luftës kanë vdekur mijëra persona dhe miliona të tjerë janë zhvendosur nga shtëpitë e tyre.
