Në një intervistë për televizionin Channal 4, presidentja Vjosa Osmani foli sot për situatën në vend, veçmas pas sulmit terrorist nga një grup kriminelësh serbë në Banjskë të Zveçanit, ku ra në krye të detyrës rreshteri i Policisë së Kosovës, Afrim Bunjaku.
Ajo e ka akuzuar Serbinë për sulmin terrorist më 24 shtator, dhe e pyetur se ”nga e di këtë“, Osmani ka përmendur arsenalin ushtarak të ushtrisë serbe që ishte në dispozicion të grupit terrorist.
Ndërsa e pyetur për mundësinë e ndikimit rus në veri të Kosovës, presidentja Osmani tha se është e mundur përfshirja e Rusisë gjithandej, derisa vuri në pah deklarimet e zyrtarëve rusë lidhur me gjendjen në rajon.
Sipas saj, Serbia ndihmohet vazhdimisht nga presidenti i Rusisë, Vladimir Putin.
Tutje presidentja Osmani foli për Policinë e Kosovës, e cila, siç tha ajo, u tregua e shkëlqyer në aksionin kundër terroristëve serbë në Banjskë të Zveçanit, derisa shtoi se e njëjta është e para në marrjen e përgjegjësisë në sigurinë e vendit, pastaj EULEX, për të arritur te KFOR-i.
