Presidentja e vendit, Vjosa Osmani është takuar sot me ministrin e Punëve të Brendshme, Xhelal Sveçla dhe drejtorin e përgjithshëm të Policisë së Kosovës, Gazmend Hoxha.
Përmes një njoftimi për media bëhet e ditur se gjatë takimit u diskutua për zhvillimet në vend, me theks të veçantë lidhur me situatën e fundit të sigurisë në Kosovë, përcjell teve1.info
“Presidentja Osmani falënderoi për punën e shkëlqyeshme dhe profesionale, si dhe angazhimin e pashoq te Policisë së Kosovës. Ajo edhe njëherë ka shprehur vlerësimin e lartë për veprën e heroit të Kosovës, rreshterit të Policisë së Kosovës, Afrim Bunjakut, i cili u vra nga grupet kriminale e terroriste në veri të vendit”, thuhet në njoftim.
Në takim po ashtu u diskutua edhe “lidhur me zhvillimet e sigurisë dhe veprimet armiqësore të Serbisë ndaj Kosovës, punën e institucioneve të sigurisë së Kosovës”, si dhe për koordinimet me aleatët dhe prezencën ndërkombëtare të sigurisë në Kosovë.
Presidentja Osmani ka theksuar se Kosova mbetet e përkushtuar për paqe dhe siguri në vend e rajon dhe se institucionet e Kosovës do të veprojnë në partneritet të ngushtë me aleatët në mbrojtje të integritetit dhe sovranitetit territorial të Kosovës “përballë veprimeve destabilizuese të Serbisë kundër Kosovës”. /Teve1.info/
