Ushtaraku i pensionuar, njëherësh ish-kolonel i Forcës së Sigurisë së Kosovës, Afrim Veseli, vlerësoi që pas sulmit të fundit në veri, Bashkimi Evropian fillimisht duhet ta ndëshkojë Serbinë me heqjen e vizave, e pastaj me pasoja të tjera.
Kjo pasi sipas tij, njerëz të tillë, siç ishte grupi terrorist në Banjskë, përbëjnë rrezik për të gjithë popujt e Bashkimit Evropian, shkruan teve1.info.
“Unë besoj që Bashkimi Evropian, hapin e parë që do të duhej ta ndërmerrte, është që Serbisë t’ia ndalojë lëvizjen e lirë. Këta njerëz të tillë janë rrezik për popujt e Bashkimit Evropian. Pra, shembull më të mirë që e pati Kosova me këta kriminelë, që në një vend autonom, sovran, e ku është NATO prezent, të mendojnë ta shkaktojnë një agresion të tillë, e përsëri ua lejojnë lëvizjen e lirë, unë s’mund ta marrë me mend një gjë të tillë”, deklaroi Veseli në emisionin “Ditari”.
Më tej, Veseli thotë që i tërë aksioni në kuptimin strategjik, është përgatitur në Beograd, teksa theksoi që Milan Radojiçiç, ka qenë vetëm mekanizëm i atij grupi.
“Kjo është përgatitur nga Republika e Serbisë për ta sulmuar Republikën e Kosovës. Milan Radojiçiç është komandant i operacionit. Ky plan në kuptimin strategjik është përgatitur në Beograd, është përgatitur nga kreu shtetëror i Serbisë, duke përfshirë presidentin Vuçiq dhe shefin e BIA-s. Radojiçiç ka qenë vetëm një mekanizëm i tyre për ta realizuar planin e destabilizimit të pjesës veriore”, u shpreh tutje Veseli në Tëvë1.
Ndërkaq, i pyetur se si mund të ishte fundi i tërë këtij sulmi në aspektin e pasojave, Veseli vlerësoi që epilogu do të ishte mjaft i keq për banorët shqiptar në veri dhe për banorët e nacionalitetit boshnjak.
“Është edhe diçka shumë interesante në tërë këtë plan. Kësaj radhe, komuniteti serb në pjesën veriore të vendit, nuk ka pasur mbështetje të madhe civile ndaj grupit terrorist. Siç duket, popullata serbe ka filluar të vetëdisohet që përmes dhunës dhe kriminelëve të tillë, nuk arrihet paqja dhe nuk jetohet me ta”, potencoi Veseli./teve1.info/.
