Ekipi i Tëvë1 është duke qëndruar te udhëkryqi i fshatit Banjskë të Komunës së Zveçanit, aty ku dje në orët e para të mëngjesit është sulmuar Policia e Kosovës, ku një polic ka mbetur i vrarë, një është plagosur, si dhe një tjetër është lënduar.
Gazetari, Arton Rama, ka bërë të ditur se medieve iu është ndaluar për të hyrë në këtë fshat, kjo për shkaqe sigurie.
“Policia ka bllokuar hyrjen për në këtë fshat dhe medieve iu është ndaluar që të shkojnë drejt Manastirit, kjo për shkaqe të sigurisë”, tha gazetari.
Gjithashtu, ai tha se Policia e Kosovës është duke vazhduar operacionin për gjetjen e pjesëtarëve të grupit kriminal që dyshohet se kanë ikur nga Manastiri.
“Policia është duke e vazhduar aksionin për kërkimin e pjesëtarëve të grupit kriminal që dyshohet se kanë ikur nga Manastiri, për këtë arsye policia nuk është duke na lejuar që të hyjmë në këtë fshat. Përveç stacionimeve, diku në pesë blloqe kem parë numër të madh të autoblindave të Policisë të Kosovës, të cilët janë duke lëvizur në këtë pjesë”, raportoi ai./teve1.info/
