Eksperti i sigurisë në Kosovë, Fatmir Çollaku, tha se nuk sheh përkeqësim të situatës në veri të Kosovës, siç tha ai, së paku për sot dhe nesër, raporton teve1.info
Çollaku këtë deklarim e dha në emisionin debatues në Tëvë1, “Këndi i Debatit”, derisa reagimin e Policisë së Kosovës e quajti sukses në kuptimin operativ dhe taktik.
“Konsideroj që nuk pritet të ketë ndonjë përkeqësim të situatës sot dhe nesër dhe kjo konsiderohet sukses policor në kuptimin operativ dhe taktik, të një pengimi të cilin e ka synuar ky grup tashëm veç i njohur grup i strukturuar edhe kriminal edhe terrorist kundër shtetit tonë, kundër rendit kushtetues. Nga aspekti juridik dhe penal bëhet fjalë për vepër penale kundër rendit juridik dhe kushtetues dhe lëndim i sigurisë nacionale dhe i integritetit territorial të Kosovës. Nuk shoh përkeqësim të situatës më vonë, kjo do të ishte një parashikim i imi i tanishëm, çka do të ndodhë në ditët në vijim do të shohim por mendoj se kaq do të jetë për sot dhe nesër”, tha ai.
Çollaku shtoi se zhvillime në aspektin politik do të ketë shumë edhe në rrafshin vendor dhe atë ndërkombëtar, por jo edhe atë të sigurisë.