Ministri i Punëve të Brendshme, Xhelal Sveçla, tha se pas arrestimit të tre serbëve për krime të kryera ndaj popullatës civile gjatë luftës në Kosovës, grupet kriminale mbrëmë kanë hedhur granatë dore ushtarake në Lagjen e Boshnjakëve.
Përmes një postimi në Facebook, Sveçla ka shkruar se urdhri për këtë akt, ka ardhur nga presidenti serb, Aleksandar Vuçiq, raporton teve1.info.
“Nga njësitë relevante të Policisë së Kosovës pas një angazhimi të gjatë e me dyshime të bazuara, janë arrestuar 3 qytetarë serbë për krime të kryera ndaj popullatës civile gjatë luftës në Kosovë. Të njëjtit dyshohet të kenë qenë bashkëpunëtorë në tortura, plagosje, vrasje, dëbim, dhe masakra ndaj shqiptarëve në Vushtrri, fshatrat e saj përreth dhe në Burgun e Smrekovnicës. Në shenjë revolte ndaj arrestimit të këtyre personave, si mesazh ndaj drejtësisë sonë dhe me qëllim të shkaktimit të terrorit tek qytetarët tanë, grupe kriminale mbrëmë kanë hedhur granatë dore ushtarake në Lagjen e Boshnjakëve. Inspirimi, mbështetja dhe urdhëri për këtë akt kriminal ka ardhur nga ish Ministri i Propagandës në kohën e Millosheviqit, Aleksandër Vuçiq. Serbia ka kryer gjenocid në Kosovë. Serbia me në krye Vuçiqin, jo vetëm që nuk e pranon këtë fakt, por glorifikon kriminelët e luftës. Dëshmia e qëndrimit të saj të pandryshuar është vetë planifikimi i aktit të hedhjes së granatës”, thuhet në postimin e Sveçlës.
Po ashtu, Sveçla ka thënë se krimet e kryera gjatë luftës në Kosovë do të ndiqen deri në fund.
“Kosova do të jetë shtet i së drejtës, i qytetarëve të barabartë ku barazia dhe prosperiteti do të garantohen për të gjithë”, thuhet tutje.
Kujtojmë që mbrëmë një shpërthim i fuqishëm që dyshohet të jetë granatë dore ka ndodhur në “Lagjen e Boshnjakëve” në veri të Mitrovicës, e cila është e banuar me popullatë të përzier.
Policia ka dalë në vendngjarje dhe është duke zhvilluar hetimet./teve1.info/.