Zëvendëskryeministri, Besnik Bislimi, ka pritur në takim lamtumirës ambasadorin e Zvicrës në Kosovë, Thomas Kolly.
Përmes një komunikate, bëhet e ditur se gjatë takimit u bisedua për forcimin e bashkëpunimit mes të dyja vendeve, njëherit për potencialin për zhvillim të Kosovës dhe mundësitë që ofrohen për investim, përcjell teve1.info.
“Zëvendëskryeministri i parë për Integrim Evropian, Zhvillim dhe Dialog i Republikës së Kosovës, Besnik Bislimi, priti në një takim lamtumirës ambasadorin e Zvicrës në Kosovë, Thomas Kolly. Kosova dhe Zvicra ndajnë një miqësi e partneritet të ngushtë mes tyre. Në këtë takim, u bisedua mbi forcimin e bashkëpunimit, potencialin për zhvillim të Kosovës dhe mundësitë që vendi ynë ofron për investim. Ambasadori Kolly nga ana e tij veçoi sektorin e TI dhe suksesin e Kosovës në këtë drejtim. Bisedat miqësore mes zëvendëskryeministrit Bislimi dhe ambasadorit Kolly, kanë qenë të shpeshta e të frytshme. Edhe në këtë takim lamtumirës ata e vlerësuan njëri tjetrin për gatishmërinë për bashkëpunim dhe kontributin e vazhdueshëm në forcimin e marrëdhënieve mes shteteve tona”, thuhet në komunikatë.
Po ashtu, Bislimi ka falënderuar ambasadorin për kontributin e tij, teksa ka ritheksuar që Zvicra mbetet partnere e rëndësishme me të cilën ndan vlera të përbashkëta me Kosovën./teve1.info/.