Shefja e Grupit Parlamentar të Lëvizjes Vetëvendosje, Mimoza Kusari-Lila, deklaroi se kërkesa e partive opozitare për themelimin e Komisionit Hetimor Parlamentar për keqpërdorimin e rezervave shtetërore, ka për synim të krijojë paralelizëm me organet e hetuesisë.
Gjatë seancës plenare në Kuvend, në kuadër të diskutimit lidhur me procedurat për furnizimin dhe menaxhimin me rezervat shtetërore, Kusari-Lila vlerësoi se kjo iniciativë e deputetëve opozitarë është e ngutshme, me ç’rast drejtuar deputetëve të pranishëm në sallë, i pyeti se “a nuk kanë besim tek Prokuroria dhe Policia e vendit”, përcjell teve1.info.
“Ky hetim parlamentar po tenton të bëjë paralelizëm, për diçka që organet e rendit tashmë janë të përfshira. Pyetja për deputetët është shumë e thjeshtë “a nuk po i besoni Prokurorisë, apo po e konsideroni veten më të aftë se Prokuroria e Policia e vendit? Gjithashtu, shpenzimet të cilat lidhen me mbarëvajtjen e punës së Komisionit Parlamentar, në Komisionet Hetimore Parlamentare të cilat kanë zgjatur përafërsisht në periudhën e njëjtë kohore, shpenzimet shkojnë deri në 20 mijë euro, që përfshihen mëditjet e deputetëve, angazhimin e deputetëve dhe kjo vlerë është pothuajse dy fish më e madhe se gati vlera e grurit, për të cilën po kontestohet. Prandaj, kjo kërkesë përveç që nuk ka kuptim, synon të krijojë paralelizëm me organet e hetuesisë”, potencoi Kusari-Lila para deputetëve.
Kujtojmë se Lidhja Demokratike e Kosovës, ka iniciuar themelimin e Komisionit Parlamentar lidhur me procedurat për furnizimin dhe menaxhimin me rezervat shtetërore, si dhe për keqpërdorimet dhe abuzimet e mundshme me këto rezerva.
Kjo nismë erdhi pas arrestimit të dy zyrtarëve të Ministrisë së Industrisë, Ndërmarrësisë dhe Tregtisë dhe të një biznesmeni lidhur me furnizimin me grurë dhe vaj ushqimor për rezervat shtetërore të vitit 2022./teve1.info/.