Anëtari i PDK-së dhe mbajtësi i disa pozitave në këtë parti, Ramë Buja, ka thënë se Partia Demokratike e Kosovës ka nevojë për dinamizim të politikës së saj, raporton teve1.info
Në emisionin “Respublika” në Tëvë1, Buja ka thënë se në kuadër të dinamizmit të partisë do të ishin të mirëseardhur edhe ish anëtarët ë kësaj partie, siç është Fatmir Limaj, por edhe njerëz të rinj të cilët e kanë vullnetin për të punuar dhe kontribuuar në parti.
Ai tha se do të ishte faj i madh nëse dikush do të vendoste “diga” për ardhjet e reja në parti apo rikthimin e të tjerëve.
“Do të ishte faj i madh nëse dikush vë në diga për të mos ardhë dikush si nismëtar ose fillestar ose rikthehet në subjektin politik. Unë jam mbështetës i asaj që kushdo që e ka dëshirën dhe disponimin dhe gatishmërinë për punë dhe angazhim, të vijë në PDK, pse jo. Kështu që unë jam kundër asaj që të mohohet ardhja edhe e Fatmirit edhe e Fatmirëve tjerë që e kanë disponimin për të ardhur”, ka deklaruar Buja.
Ndërsa, i pyetur nëse ish anëtarin e kësaj partie, Fatmir Limajn, e sheh si anëtar të partisë apo lider të saj, Buja ka një përgjigje.
“Këto gjëra përcaktohen me vullnetin në vazhdimësi dhe në ecje. Unë do kisha dashur që ai njeri të jetë në PDK sepse do ta fuqizoj PDK-në e pastaj vota e partisë e përcakton se kush do të jetë i pari e kush i dyti e kush më pastaj edhe më”, ka deklaruar Buja.
Ndërsa, i pyetur nëse e konsideron se PDK ka nevojë për dinamizmi të politikës së saj, ish ministri Ramë Buja e ka pohuar një gjë të tillë.
