Në një postim në Facebook, Nagavci ka shtuar se dhuna, sidomos në institucionet arsimore, kërkon vëmendjen dhe kujdesin e të gjithëve.
Ministrja Nagavci ka shtuar se MASHTI po bën përpjekje që komuniteti shkollor të ndërgjegjësohet për temën e dhunës.
“Duke qenë se dhuna vjen nga shkaktarë e faktorë të ndryshëm, MAShTI po bën përpjekje që komuniteti shkollor të ndërgjegjësohet për temën e dhunës, të ketë qëndrim proaktiv në trajtimin e saj dhe të ushtrojë rolin e duhur në parandalim nëpërmjet të arsimit cilësor. Edhe pse roli i psikologut dhe pedagogut është shumë i rëndësishëm, aktualisht në nivel vendi kemi 146 të tillë në shkolla dhe më vjen keq që në të kaluarën granti që është ndarë për punësimin e tyre është përdorur nga komunat për punësimin e kuadrove të tjera”, ka shkruar Nagavci.
Ajo ka potencuar se dikasteri që ajo udhëheq do të rrit shërbimet mbështetëse për shkolla për të monitoruar veprimet brenda sistemit të mbrojtjes së fëmijës nga çdo formë e dhunës.
“Prandaj, do të rrisim shërbimet mbështetëse për shkolla dhe do të veprojmë me aktivitete sensibilizuese për rritjen e vëmendjes dhe përgjegjësisë institucionale karshi fenomenit të dhunës. Jemi të përkushtuar në vazhdim që të kemi grup ndërinstitucional aktiv, për të përcjellë dhe monitoruar veprimet brenda sistemit të mbrojtjes së fëmijës nga çdo formë e dhunës. Por, na duhet një bashkëpunim i ngushtë edhe mes mësimdhënësve, nxënësve, prindërve, familjes dhe gjithë komunitetit, për ta parandaluar këtë dukuri të dhimbshme që rëndon mbi shoqërinë tonë”, ka shkruar Nagavci në Facebook.
Nagavci ka marrë sot pjesë në tryezën e diskutimit mes Komisionit Parlamentar për Arsim, Shkencë, Teknologji, Inovacion, Kulturë, Rini dhe Sport, dhe Koalicionit të OJQ-ve për Mbrojtjen e Fëmijëve – KOMF. /Teve1.info/
