Redaktori i gazetës “Dielli” në New York, Sokol Paja, tha se në gjykimin e mërgatës shqiptare në Amerikë, dialogu në mes të Kosovës dhe Serbisë duhet të kaloj ekskluzivisht në drejtimin e ShBA-së, raporton teve1.info
Ai në emisionin “Ditari” në Tëvë1, tha se hapi i parë i negociatave në mes të të dyja shteteve duhet të jetë njohja reciproke dhe pastaj të vazhdohet me zbatimin e marrëveshjeve tjera.
“Në gjykimin e mërgatës shqiptare amerikane, nuk do të ketë paqe, marrëveshje përfundimtare nëse negociatat nuk kalojnë si e drejtë ekskluzive e SHBA-së. Derisa mendoj se hapi i parë i marrëveshjes Kosovë-Serbi është njohja reciproke. Nëse nuk ka reciprocitet ne nuk mund të flasim për zbatimin marrëveshjeve”, tha Paja.
Ai këto komente i bëri gjatë bisedës në studio, ku tregoi për takimin e shoqatave të ndryshme shqiptare në Amerike me presidenten e Kosovës, Vjosa Osmani.
Paja i cili është redaktor i gazetës “Dielli” në New York, tha se gjatë këtij takimi me Osmanin morën pjesë rreth 60 përfaqësues të shoqatave dhe organizatave të ndryshme shqiptare.
“Takim ishte i shkëlqyer i Osmanit në New York, morën pjesë rreth 60 përfaqësues të organizatave patriotike, kombëtare, kulturore, klube të ndryshme etj. ‘Vatra’ e ‘Dielli’ u përfaqësuan denjësisht meqë këto organizata janë më të vjetrat. Osmani kërkoi nga mërgata një zgjim, shtim të përpjekjeve dhe fuqive të mërgatës në interes të Kosovës. Kërkoi nga mërgata të shtohen përpjekjet dhe binden plitikbërësit jo vetëm për njohje por edhe në anëtarësim të Kosovës në organizata të rëndësisë ndërkombëtare.
Nuk ka rënë mbështetja apo lobimi i SHBA-së për Kosovën. Por Osmani tha se në kushtet kur gjeopolitika ka ndryshuar dhe Kosova po përballet me sfida të jashtëzakonshme, me një luftë hibride, me një agresion nga Serbia dhe Rusia, nevojitet një mbështetje si në kohën e pavarësisë sepse Osmani theksoi që mërgata ishte ajo që e bindi Amerikën për të ndihmuar Kosovën. Osmani tha se Kosova është një sukses qind për qind amerikan dhe zotimet e fundit në organizata kanë treguar se Kosova është shteti dhe populli më pro-amerikan në evropë”, tha Paja.
Ai shtoi se presidentja kërkoi që mërgata të jetë e unifikuar, të jetë e bashkuar dhe lëshoi mesazhe të pastra të unifikimit të bashkimit qoftë nga qeveria e Kosovës apo Shqipërisë dhe kur bëhet fjalë për çështje kombëtare të jenë të bashkuar.