Një produkt ushqimor po shitet në aksion. Nëse e merrni një, tjetri vjen gratis.
Por, afati i përdorimit i ka skaduar tash e një javë.
Një produkt i tillë ishte prezent në një nga marketet në qytetin e Gjilanit. Madje për raste të ngjashme, qytetarët janë ankuar në vazhdimësi
Kështu, vetëm këtë vit, nga tregu i Kosovës janë asgjësuar rreth gjysmë milion kg ushqime.
“Në bazë të të dhënave statistikore që i kemi nga tri inspektoratet e brendshme të AUV-it, rezulton se janë gjysmë milioni apo rreth 500 mijë kg l varësisht nga njësia matëse e produktit ushqimor të cilat për arsye të ndryshme vlerësohet se nuk i plotësojnë kushtet për konsum dhe si të tilla janë asgjësuar”, thotë Lamir Thaçi nga AUV-i.
Sipas Agjencisë së Ushqimit dhe Veterinarisë edhe vetëdijesimi i bizneseve për të raportuar produktet e skaduara është rritur.
“Vetë bizneset janë vetëdijesuar që duhet të raportojnë për secilin rast të dyshimit te produktet e tyre, apo në rastet kur skadon afati i produkteve dhe nuk arrijnë të shiten duhet raportuar në AUV që asgjësimi të bëhet në prezencë të inspektorëve”, tha Thaçi.
Edhe numri i atyre që kërkuan ndihmë mjekësore për këtë vit si pasojë e infeksioneve nga ushqimi është ulur.
“Siguria ushqimore në Kosovë mendoj që është relativisht e mirë t’u e pasë parasysh numrin e rasteve të infeksioneve me ushqim që është viteve të fundit duke u ulur numri i pacientëve që kërkojnë vizitë për shkak të helmimeve apo intosikacioneve elementare”, tha mjeku Lendrit Spahiu.
Sipas Organizatës Botërore të Shëndetësisë, ushqimi i pasigurt që përmban baktere, viruse, parazitë ose substanca të dëmshme kimike mund të shkaktojë më shumë se 200 sëmundje të ndryshme, duke filluar nga diarreja deri tek kanceri.
