Ministri i Mbrojtjes, Ejup Maqedonci dhe Komandanti i Forcës së Sigurisë së Kosovës, Bashkim Jashari, me ftesë të partnerëve britanikë, qëndruan për vizitë zyrtare në Mbretërinë e Bashkuar.
Bëhet e ditur që fokus i takimit ishte njoftimi me ministrin Maqedonci, njëherit diskutimet në funksion të partneritetit dhe aktiviteteve në kuadër të bashkëpunimit dypalësh, raporton teve1.info.
“Me ftesë të partnerëve Britanik, Ministri i Mbrojtjes, Z. Ejup Maqedonci dhe Komandanti i Forcës së Sigurisë së Kosovës, Gjenerallejtënant Bashkim Jashari, së bashku me delegacionin nga Ministria e Mbrojtjes dhe Forca e Sigurisë së Kosovës vizituan panairin e Mbrojtjes dhe Sigurisë (DSEI) në Londër. Në suaza të vizitës, Ministri Maqedonci dhe Gjenerallejtënant Jashari të shoqëruar nga Ambasadori i Kosovës në Mbretërinë e Bashkuar, SH.T. Ilir Kapiti, Atasheu i Mbrojtjes së Kosovës në Londër, Atasheu Ushtarak i Mbretërisë së Bashkuar në Kosovë u takuan me Ministrin e Forcave të Armatosura të Mbretërisë së Bashkuar, z.James Heappy. Fokus i takimit ishte njoftimi me Ministrin Maqedonci dhe diskutimet në funksion të partneritetit dhe aktiviteteve në kuadër bashkëpunimit dypalësh”, thuhet në njoftimin e Ministrisë së Mbrojtjes në Facebook.
Po ashtu, kanë njoftuar që Maqedonci dhe Jashari kanë falënderuar Mbretërinë e Bashkuar për përkrahjen e vazhdueshme ndaj Kosovës dhe FSK-së.
“Republika e Kosovës dhe Forca e Sigurisë së Kosovës qëndrojnë të palëkundur dhe të përkushtuar në partneritetin afatgjatë me Mbretërinë e Bashkuar”, thuhet tutje në postim./teve1.info/.