Kryetari i Prishtinës, Përparim Rama, thotë se arrestimet e fundit në kryeqytet kanë të bëjnë me disa kontrata mbi vepra.
Rama, arrestimet i ka quajtur të paarsyeshme.
“E kanë marrë në pyetje edhe nënkryetarin, mendoj që është për disa kontrata mbi vepër, kryeqyteti funksionon me një buxhet me të dhëna të viti 2011 sa i përket numrit të banorëve. Ajo çka ka ndodhur është jashtë proporcioneve nuk e shoh të arsyeshme, por po ia lë proceseve ligjore të merren me këtë punë, nuk e shoh që ka pasur diçka jashtë normales, personalisht po them në bazë të arsyes pse është bërë, pse tash, do të kuptojmë më shumë e bisedojmë më vonë”, tha Rama gjatë një konference për media.
Tre zyrtarë të Qendrës për Punë Sociale në Komunën e Prishtinës, janë arrestuar ditë më parë nën dyshimin për keqpërdorim të detyrës.
Për këtë rast është intervistuar në cilësinë e dëshmitarit edhe nënkryetari i Komunës së Prishtinës, Alban Zogaj. Ai ka thënë se ky rast ndërlidhet me nënshkrimin e disa kontratave mbi vepër, të cilat thotë se i kanë trashëguar nga qeverisja e kaluar
Të arrestuarit janë shefi i Personelit të Komunës së Prishtinës, Fadil Aliu-Hertica, ish-drejtori i Qendrës për Punë Sociale, Vebi Mujku dhe Shefja e Njësisë së Shërbimeve Sociale në këtë qendër, Valbona Makiqi.
Ata dyshohen për punësimin e kundërligjshëm të 10 personave në këtë qendër dhe caktimin e një të punësuare në pozitën e menaxheres në mënyrë të kundërligjshme për trajtimin e rastit të dhunimit të 11-vjeçeres.
