Ministrja e Drejtësisë, Albulena Haxhiu ka reaguar pasi deputetja e PDK-së, Blerta Deliu e ka paditur sot për shpifje.
Në një postim në Facebook, Haxhiu ka thënë se do ta bëjnë publik raportin financiar që dëshmon se Deliu është paguar në mënyrë të paligjshme, ndonëse nuk ka qenë pjesë e shumë mbledhjeve të Komisionit për Kompensimin e Viktimave të Krimit, përcjell teve1.info
“Për çfarë më paska paditur deputetja Blerta Deliu Kodra? Për të vërtetën? Shumë mirë.
Ne do ta bëjmë publik raportin financiar i cili dëshmon që e njëjta ndonëse nuk kishte qenë pjesëmarrëse në shumicën e mbledhjeve te Komisionit për Kompensimin e Viktimave të Krimit, ishte paguar për këtë në mënyrë të paligjshme. Para disa javëve, për këtë e kam njoftuar me shkrim Kryetarin e Komisionit për Legjislacion dhe po ashtu kam folur publikisht”, ka shkruar ajo.
Deputetja e PDK-së, Blerta Deliu ka dorëzuar sot padi për shpifje ndaj ministres së Drejtësisë, Albulena Haxhiu.
Deliu ka theksuar se nuk kalon “tendenca që me shpifje dhe fyerje ndaj opozitës me e zhvendosë vëmendjen nga skandalet korruptive të kësaj qeverie”. /Teve1.info/
