Lëvizja Vetëvendosje ka mbajtur konferencë për media rreth çështjes së librave dhe seancës së jashtëzakonshme të thirrur nga opozita, të hënën.
Deputeti i kësaj partie, Ardian Gola ka thënë se VV-ja e ka bojkotuar seancën e jashtëzakonshme për librat sepse ajo ka qenë politike dhe ka pasur tendencë që t’ua prishë disponimin nxënësve.
Sipas tij, duhet të priten të dhënat e sakta për të diskutuar rreth këtij vendimi, e se edhe viteve të kaluara ka pasur vonesa në sigurimin e librave shkollorë.
“Qysh në fillim kemi një qasje që për ne është e papranueshme që në thirrjen e opozitës është thënë që ka dështuar Qeveria, kur ende është në proces i gjithë furnizimi me tekstet shkollore. Nuk e kemi ende një epilog të procesit, që ne nuk besojmë se ka diçka të pazakontë. Kjo çështje do të diskutohet në Kuvend pasi që të kemi një epilog. Kemi të bëjmë me një ndryshim të praktikes të distribuimit, përkatësisht shpërndarjes së librave shkollorë. Ne ende nuk i dimë implikimet e këtij vendimi për të zhvilluar ndonjë debat të mirë-informuar dhe mbi informata të sakta. Edhe sikurse vitet e kaluara kemi pas vonesë në sigurimin e teksteve shkollore. Meqë ka qenë kështu çdo vit, ne ende nuk e dimë saktë nëse kjo vonesë është për shkak të vendimit të ndërmarrë nga Qeveria apo është për disa shkaqe të cilat kanë qenë evidente edhe në të kaluarën”, ka theksuar ai, raporton eo.
Gola ka thënë se ky vendim ka ardhur si rezultat i nevojës për të shmangur abuzimet me librat.
“Ky vendim ka ardhur si rezultat i nevojës për të shmangur abuzimet, keqmenaxhimet, mungesën e planifikimeve të qëndrueshme në të kaluarën. Gjitha këto të evidentuara qartazi nga organet e pavarura të Republikës së Kosovës, që janë auditimet.Ky vendim do të diskutohet edhe në komision pasi t’i kemi të dhënat e qarta të këtij procesi, por jo seanca të cilat zhvillohen përmes të gjeturave arbitrare dhe kanë qëllim t’ua prishin disponimin fëmijëve në fillim të vitit shkollor”, u shpreh ai.
Po ashtu, në konferencë u bë e ditur se deri më tani 130 mijë prindër kanë aplikuar për rimbursimin e librave e se mësimi nuk ka filluar në 18 shkolla, jo për shkak mungesës së librave, por për shkak të renovimeve.
