Real Madridi kërkon të vazhdojë formën e mirë që e ka treguar këtë edicion edhe në kuadër të xhiros së katërt të La Liga. Në këtë xhiro, Real Madridi luan në shtëpi kundër skuadrës së Getafes. është kjo ndeshja e parë për klubin madrilen që e luan në stadiumin “Santiago Bernabeu” këtë edicion në kampionat. Dueli nis në orën 16:15 të shtunën dhe Reali vlerësohet favorit, përkundër mungesës së brazilianit Vinicius Junior shkaku i lëndimit.
Reali është ekipi i vetëm në Spanjë që ka tri fitore deri më tani dhe i prinë tabelë me nëntë pikë të mbledhura. Getafe ka katër pikë dhe në këtë ndeshje futet pas fitores së arritur vikendin e shkuar, e cila erdhi pas një barazimi dhe disfate.
Ndeshja e parë e La Ligas, të shtunën është ajo ndërmjet Real Sociedadit e Granadas, që starton në orën 14:00, ndërsa në mbrëmje do të luhen edhe duelet Alaves – Valencia e Betis Rayo Vallecano.
Atletico Madridi që ka dy pikë më pak se Reali, këtë vikend do të ketë një punë të vështirë. Në stadiumin “Wanda Metropolitano” e pret skuadrën e Sevillas, që është e vetmja pa pikë pas tri xhirove të zhvilluara deri më tani.
Ndërkohë, dueli ndërmjet Osasunas dhe Barcelonës, do ta mbyllë xhiron e katërt të futbollit spanjoll. Ndeshja ndërmjet këtyre dy skuadrave, zhvillohet prej orës 21:00 kurse Barcelona vlerësohet favorite pasi në tri ndeshjet e para, ka regjistruar dy fitore dhe një barazim. Ka shtatë pikë sikurse Atletico Madridi e Girona. Girona, të dielën prej orës 14:00 luan në shtëpi kundër skuadrës së Las Palmasit.