Komuna e Drenasi ka reaguar pas publikimit në media të një lajmi lidhur me procedurat e sterilizimit të instrumenteve mjekësore në Qendrën Kryesore të Mjekësisë Familjare të kësaj komune.
Sipas tyre, nuk ka shkelje lidhur me sterilizimin e instrumenteve, sepse është i bazuar në standardet si në tërë QKMF-të në pajtim me Manualin e Ministrisë së Shëndetësisë.
“Në media janë publikuar disa foto tendencioze të ngritura lidhur me procedurat e sterilizimit të instrumenteve mjekësore në Qendrën Kryesore të Mjekësisë Familjare në Drenas (QKMF). Nuk ka shkelje lidhur me sterilizimin e instrumenteve, sepse është i bazuar në standardet si në tërë QKMF-të në pajtim me Manualin e Ministrisë së Shëndetësisë. Kjo rregullsi konfirmohet nga Inspektorati i AUV, me numër procesverbali 0022129, të datës 28.8.2023. Në Procesverbal, sa i takon sterilizimit thuhet: “Pastrimi i instrumenteve (veglave) të punës, bëhet në mënyrë të rregullt dhe në fund vendosen në sterilizator””.
Tutje thuhet se sipas Procedurave standarde të sterilizimit të thatë, të Qendrës Kryesore të Mjekësisë Familjare “Dr. Hafir Shala” në Drenas, procedura e pastrimit të pajisjeve me ujë dhe mjete dezinfektuese, është i rregullt.
“Pastrimi i pajisjeve mjekësore është bërë edhe me ujë të vluar, madje më shumë se sa parashihet me Procedurën standarde, me mjete dezinfektimi. Më pas, ato shpërlahen, thahen dhe vendosen në sterilizator. Tendenca për të manipuluar opinionin lidhur me Mjekësinë parësore në Drenas nuk është dukuri e re. Gjithsesi, do të bëhet padi ndaj keqbërësve për shpifje, frikësim dhe dezinformim. Ky manipulim i keqbërësve ka për synim largimin e qytetarëve nga institucionet publike shëndetësore dhe nga qeverisja më e mirë e më transparente në Kosovë. Mediat të cilat e kanë publikuar artikullin me tendencë duke e gjymtuar të vërtetën, kërkojmë ta botojnë këtë sqarim dhe në rast se nuk e publikojnë, do të ushtrojmë po ashtu padi për shpifje”, thuhet në reagim.
