Drejtuesit e Manchester City vijojnë punën në merkato për të gjetur zëvendësuesin e Riyad Mahrez që u transferua në Arabinë Saudite te skuadra e Al Ahli. Pasi dështuan për transferimin e Lucas Paqueta apo edhe Dani Olmos, “The Citizens” kanë vendosur nën shënjestër Jeremy Doku. 21-vjeçari është pjesë e Rennes në Francë ndërsa konsiderohet si një nga talentët më të mirë të Belgjikës.
Anësori mund të ishte një alternativë e mirë në të dyja krahët e sulmit dhe tashmë anglezët do të provojën ta mbyllin këtë tratativë për shumën e 55-60 milionë eurove. Bisedimet me Rennes vazhdojnë dhe te City presin që të arrijnë në një akord brenda kësaj jave.
Nga ana tjetër, nuk ka asnjë problem për marrëveshjen me lojtarin që ka gjetur gjuhën e përbashkët me drejtuesit e Cityt prej fillimit të muajit gusht. Në tre vite pjesë e Rennes, Doku është aktivizuar në 74 ndeshje duke realizuar edhe nëntë gola ndërsa prej vitit 2020 është pjesë edhe e kombëtares së Belgjikës.
