Pacientët po bëjnë pagesën për marrjen e shërbimeve të ndryshme mjekësore.
Por, nëpunësit e Qendrës Kryesore të Mjekësisë Familjare në Vushtrri, kanë një hall tjetër. Sipas tyre, disa nga pagesat po kryhen me para false. Nga ana e tyre, edhe qytetarët janë në dijeni për këtë problematik.
Por thonë se e kanë të vështirë të bëjnë dallimin e tyre.
E dikush që e lajmëroi një rast të falsifikimit, po ankohet se i doli shumë punë.
“Po e lajmëruam, me shume na dul pune neve, se atij shitesit, vec duart kur na i kqyra, tha keta qenkan punetore, tha keta sjane te fallcit. 50 euro i dallojë kur janë fallco, edhe ata ndihme i kemi marre”, tha një qytetar.
E për t’i ikur kësaj dukurie, Drejtoria e Shëndetësisë në këtë komunë ka propozuar blerjen e detektorëve.
“Në kuadër të QKMF-së në vitin që ishim, kemi planifikuar që gjatë vitit 2023 , nga mallrat dhe shërbimet të investojmë në aparat për detektorë të monedhave falso. Arsyeja se ka qene gjithmonë shqetësimi nga ana e nëpunësve tanë, të cilët punojnë tek participimi, janë shqetësuese se mos po pranojnë pare falso”, deklaroi shefi i Financave në QKMF në Vushtrri, Fisnik Kamberi.
Kamberi thotë se furnizimi me detektorë është planifikuar që të bëhet në 20 qendra të mjekësisë familjare.
“Në rastin konkret ne kemi planifikuar buxhetin dikun 2.700 euro që të furnizojmë për shkak se ne kemi 20 qendra të mjekësisë familjare në kuadër të komunës së Vushtrrisë, të cilat e kanë edhe agjendën në vise rurale, dhe në qytet në vise urbane. Në rastin konkret jemi munduar që të eliminojmë të gjitha defektet që mund të ndodhë që dikush të pranon para falso”, shtoi ai.
Por si duket ky problem nuk pritet të zgjidhet shpejt. Pasi tenderi për furnizim me detektorë, i hapur gjatë muajit maj të këtij viti, u anulua më 14 gusht.
Sipas prokurimit, arsyeja e anulimit të tenderit është bërë për shkak se nuk ka përputhje mes çmimit total me dosjen e tenderit, sa i përket përshkrimit të çmimit.
Lidhur me këtë Tëvë1 ka kërkuar përgjigje edhe nga Drejtoria e Shëndetësisë në këtë komunë, të njëjtit kanë thënë se do të bëjnë prapë kërkesë, me qëllim që furnizimi me detektorë të bëhet brenda këtij viti.
“Po ne e shohim shumë të nevojshme furnizimin me detektor që të bëhet identifikimi i monedhave të falsifikuara, për shkak që po na bëhet dëm. Shpresojmë që kjo të na mundësohet sa më shpejt dhe furnizimi të bëhet para vitit të ri”, ka bërë të ditur drejtori i Shëndetësisë në Komunën e Vushtrrisë, Nexhmedin Rashica.
E në një përgjigje për Tëvë1, Policia e Kosovës ka bërë me dije se në gjashtë muajt e parë të këtij viti janë shënuar 486 raste të falsifikimit të parave false.
Kronika e realizuar nga gazetarja Riga Gjata