Lamir Thaçi, zëdhënësi i AUV-it, ka thënë se ky vendim është kërkesë ligjore në momentin që shfaqet dhe konfirmohet virusi në secilën zonë të secilit shtet, i cili eksporton në Republikën e Kosovës.
Sipas tij ky vendim nuk është masë ndalesë, por ka të bëjë me pengimin e përhapjes së virusit të gripit të shpezëve.
“Nuk shoh që do të ketë efekt negativ sa i përket qarkullimit tregtar për shkak se qarkullimet e tjera tregtare janë duke vazhduar normal tek autoritetet shqiptare. Kufiri ka ngritur nivelin e kontrollit dhe janë duke u kontrolluar të gjitha ngarkesat e tjera. Secili shtet në bazë të rregullave ndërkombëtare për shëndet të kafshëve ka për obligim që secilin rast të konfirmuar të përhapjes së këtij virusi duhet ta raportojë në UE dhe vetë Shqipëria e ka raportuar, edhe ne e kemi raportuar kur e kemi pasur si virus dhe jemi në kontakte të vazhdueshme me autoritetet e shteteve përreth dhe shtetet e tjera për ta ndaluar përhapjen e shpejtë të këtij virusi”, ka thënë Thaçi.
Tutje ai tha se janë në kontakt të vazhdueshëm edhe me fermerët dhe me Shoqatën e Shpezëtarëve, për marrjen e të gjitha veprimeve të masës së biosigurisë në fermat e tyre dhe sipas tij janë të përgatitur mirë për çfarëdo situate që do të ndodh.
Thaçi ka sqaruar se Kosova vitin e kaluar ka arritur që të parandalojë përhapjen e kësaj sëmundje falë angazhimit të të gjitha institucioneve përgjegjëse, prandaj edhe ka kërkuar kujdes./EO
