Pas arrestimit të dy zyrtarëve të MINT-it, Partia Demokratike e Kosovës po kërkon nga kryeministri Albin Kurti ta shkarkojë nga detyra ministren Rozeta Hajdari.
Në një konferencë për media, sekretari i PDK-së, Betim Gjoshi deklaroi se në një “qeverisje normale” ministrja Hajdari është dashur të jap dorëheqje vetë, përcjell teve1.info
“Sot para së gjithash, përgjegjësia politike, publike e penale bie mbi Rozeta Hajdarin. Kryeministri Kurti urgjentisht sot menjëhrë duhet ta shkarkojë nga detyra”, tha Gjoshi.
Duke komentuar edhe arrestimin e Ridvan Muharremit, Gjoshi theksoi se i njëjti, në emër të kryeministrit Kurti, ka kërkuar “gjetjen e katër dëshmitarëve katolikë kundër krerëve të UÇK-së në Hagë”.
“Ridvan Muharremi është personi i cili në emër të Kryeministrit dhe me lejen e tij, përveç se është marrë me biznese të ndryshme, edhe të armëve, ka kërkuar edhe gjetjen e katër dëshmitarëve katolikë kundër krerëve të UÇK-së në Hagë. Ridvan Muharremi, miku i Kryeministrit, si person i autorizuar nga Rozeta Hajdari jashtligjshëm sepse nuk i ka plotësuar kriteret, në emër të furnizmit me rezerva shtetërore, paratë e buxhetit të shtetit i ka dhënë ndërsa mallin nuk e ka marrë asnjëherë – duke i shkaktuar qindramijëra euro dëme vendit”, u shpreh ai.
Gjithashtu, Gjoshi potencoi se prioritet i vendit tani është që të shkojë në zgjedhje të jashtëzakonshme.
Pas një aksioni disaorësh mëngjesin e sotëm, Policia e Kosovës ka arrestuar Ridvan Muharremin, në lokalin e tij “Bukë e Zemër”.
PK-ja ka zhvilluar një aksion në shtëpinë dhe lokalin e Muharremit, njeriut që në disa përgjime përmendet rreth sigurimit të rezervave shtetërore.
Bastisje ka pasur edhe te Ministria e Tregtisë, ku sipas raportimeve janë arrestuar dy zyrtarë të MINT-it, Hafiz Gara dhe Irfan Lipovica, nën dyshime për dallavere me rezervat shtetërore.
Rreth këtij aksioni kanë dhënë detaje edhe nga Prokuroria Speciale, të cilët kanë bërë të ditur se tre të arrestuarit dyshohen për veprat “Keqpërdorim i detyrës zyrtare”, si dhe “Dhënie të ndihmës në kryerjen e veprës penale të Keqpërdorimit të detyrës zyrtare”.
Të njëjtit janë dërguar në mbajtje për 48 orë. /Teve1.info/