Lisjan Perolli nga Partia Socialdemokrate (PSD) thotë se asnjë nga reagimet e anëtarëve të Lëvizjes Vetëvendosje për arrestimin e asamblistit të kësaj partie, Besnik Mujeci, nuk janë bërë pa e pasur “aminin” nga lideri i VV-së, Albin Kurti.
Perolli deklaroi se asgjë nga anëtarët e Vetëvendosjes nuk del në publik pa dakordimin e Kurtit, teksa theksoi se përjashtimi i Mujecit nga LVV “tregoi që janë selektivë kë ta mbajnë në parti e kë jo”.
“Mund të them që çfarëdo reagimi që e ka bërë Vetëvendosja me akterët e saj dhe me të gjithë vartësit e Qeverisë, nuk ka kaluar pa u dakorduar nga Kurti. Pra Kurti e di këtë farë pune, ai ka vendosur për këtë farë pune, dhe çfarëdo që del në publik është për shkak të aminit të tij. A reagon ai personalisht apo jo, është komplet irelevante. Çka duhet me pa në këtë rast, është shpejtësia me të cilën reaguan për Mujecin, sepse ai në istancë të fundit është më i parëndësishëm sesa të gjithë të tjerët, të cilët janë të akuzuar për vepra korruptive dhe keqpërdorim të detyrës zyrtare. E ndërkohë, për këtë, që është më pa i rëndësishëm, çdokush, praktikisht reagoi në mënyrë selektive…këta kallxuan që janë selektivë kur vendosin se kë me mbajt në parti e kë jo”, tha ai në “Ditari” në Tëvë 1.
Sipas Perollit, “nëse është përjashtuar Mujeci pse ka keqpërdor pozitën e vet, pse është zënë me çfarëdo substance narkotike, pse nuk po përdoret i njëjti parim, për krejt këta tjerët që janë nën akuza”, teksa shembull mori ministren e Tregtisë, Rozeta Hajdari.
“More Rozeta Hajdari e ka shkelur një njeri, e ka shkelur një fëmijë me kerr. Kjo tashmë është e dëshmuar në Prokurori…absolutisht duhet të dorëhiqet”, shtoi anëtari i PSD-së.
Dy ditë më parë, Policia e Shtetit në Shqipëri ka zhvilluar një operacion anti-drogë, me ç’rast nën pranga janë vënë pesë persona, dy prej tyre nga Kosova- Besnik Mujeci dhe Mithat Ramadani.
Mujeci ka qenë pjesë e Lëvizjes Vetëvendosje, deri dje kur kjo parti e përjashtoi nga të gjitha strukturat e saj. /Teve1.info/
