Katër serbë dhe një shqiptar janë arrestuar mëngjesin e sotëm në afërsi të Çeçevës të Komunës së Zubin Potokut, pasi kanë gjuajtur me armë zjarri në drejtim të zyrtarëve të Policisë së Kosovës.
Zëvendësdrejtori i Policisë në Mitrovicë të Veriut, Veton Elshani bëri të ditur për teve1.info se të dyshuarit kanë qenë me tri vetura dhe një furgon.
Sipas Elshanit, në momentin që oficerët policorë kanë tentuar t’i ndalojnë të dyshuarit, grupi i ka sulmuar me armë zjarri dhe më pas Policia është kundërpërgjigjur.
“Oficerët e policisë iu përgjigjën zjarrit, por për fat nuk pati viktima. Më pas në furgon kanë gjetur cigare dhe kanë konstatuar se ka pasur edhe lëndë narkotike. Pesë të arrestuarit dyshohen për “kontrabandë mallrash”, “posedim të lëndëve narkotike” dhe “sulm ndaj zyrtarit”. Të katër automjetet janë sekuestruar”, deklaroi ai. /Teve1.info/
