Shefi i Grupit Parlamentar të Lidhjes Demokratike të Kosovës, Arben Gashi në konferencën e thirrur për medie ka thënë se në seancën e parë të Kuvendit të Kosovës, të sesionit vjeshtor do të kërkojnë hetim parlamentar për rezervën shtetërore.
Kjo pasi sipas Gashit, qytetarët kanë nevojë ta dinë të vërtetën e siç tha ai, e vërteta është zgjidhja e duhur.
“Po jetojmë në kohën kur kriza po e mbulon krizën. Qytetarët kanë nevojë të dinë të vërtetën, e vërteta është zgjidhja e duhur për të gjithë. Keqpërdorimet, abuzimet eventuale me rezervat shtetërore pikërisht me produktet esenciale kërkojnë qasje hetimore serioze dhe përmbajtësore, prandaj në emër të Grupit Parlamentar të LDK-së, në mbledhjen e parë të sesionit vjeshtor të Parlamentit të Republikës do të kërkojmë të formohet një Komision Hetimor për të hetuar keqpërdorimet dhe abuzimet e mundshme në rezervat shtetërore. Kështu që përveç hetimeve penale që duhet ti bëjë prokuroria, ne konsiderojmë që është e domosdoshme të ketë hetime parlamentare për të parë nga afër sa e respektuan ligjin”, tha ai.
Madje Gashi tha se duhet të kuptohet se si janë menaxhuar rezervat shtetërore, cila ka qenë procedura dhe cila ka qenë forma mbi të cilën janë vlerësuar kontratat si sekrete.
“Duhet të kuptojmë të vërtetën se si janë menaxhuar rezervat shtetërore, të kuptojmë cila është procedura, dhe të kuptojmë a janë hapur tenderët për rezervat shtetërore. Nëse po si ka shkuar, nëse jo pse jo, dhe nëse këto kontrata janë klasifikuar si sekrete cila është forma që është përdorur për t’i vlerësuar këto sekrete, dhe pse janë klasifikuar të tilla, personat e përfshirë a kanë pasë certifikatë të sigurisë, çka është klasifikuar si sekret shtetëror, produkti, çmimi, vendndodhja, kontratat, personat e involvuar… Kush dhe si e ka menaxhuar këtë proces që nga fillimi deri në fund”
“E vërteta duhet të dalë në pah, është e domosdoshme për të gjithë pa përjashtim. Kjo është iniciativa që grupi parlamentar i LDK-së do ta marrë në seancën e parë “, shtoi Gashi./teve1.info./
