Kryeministri i vendit, Albin Kurti ka njoftuar se sot me kërkesë të ministrit të mbrojtjes, Armend Mehaj, ka pranuar dorëheqjen e tij.
Sipas Kurtit, dorëheqja e Mehajt është bërë për shkaqe familjare.
Teksa ka konfirmuar se si ministër të ri të Mbrojtjes ka emëruar Ejup Maqedoncin, të cilit edhe i ka uruar punë të mbarë.
“Sot, me kërkesë të ministrit të mbrojtjes, Armend Mehaj, kam pranuar dorëheqjen e tij. Kërkesa për lirim nga detyra vjen për shkaqe familjare. Ministrin Mehaj e falënderova për punën e pandërprerë, kontributin mbresëlënës, bashkëpunimin e rregullt dhe angazhimin e tij shembullor nga dita e parë e marrjes së detyrës.Ministër të ri të mbrojtjes emërova Ejup Maqedoncin, me të cilin kemi bashkëpunuar deri më tani në funksione tjera. Ministrit Maqedonci i uroj punë të mbarë në avancimin e mbrojtjes dhe sigurisë, në zhvillimin dhe ndërtimin e ushtrisë sonë”, ka shkruar ai.
“Me këtë rast zhvilluam një takim të përbashkët edhe me komandantin e Forcës së Sigurisë së Kosovës, Gjenerallejtënant Bashkim Jashari”, tha tutje Kurti./teve1.info./
