Një 39-vjeçar ka vdekur në orët e hershme të mëngjesit, i cili ishte në gjendje të rëndë pas plagëve që mori në gjuajtjen me armë zjarri në lokalin “Bon Vivant” në Prishtinë.
Lajmin e ka bërë të ditur për teve1.info shefi i repartit intensiv në QKUK, Shaqir Uka, i cili tha se shkaku i plagëve të mëdha 39-vjeçari nuk ka mundur të mbijetojë.
“Ka vdekur njëri prej të lënduarve nga plagët që kishte nga gjuajtja me armë në orët e mbrëmshme në Prishtinë. Ai ishte nën kujdesin intensiv kishte intervenik kirurgjik por për shkak të lëndimeve të mëdha, fatkeqësisht ka ndërruar jetë pasi nuk ka arritur t’i përballojë plagët”, tha Uka.
Mbrëmjen e 4 gushtit në lokalin “Bon Vivant” në qendër të Prishtinës, kanë mbetur të lënduar 21 persona pas të shtënave me armë zjarri.
Nga gjuajtja me armë zjarri janë plagosur katër meshkuj, ndërsa si pasojë e thyerjeve të gotave dhe shisheve të qelqit kanë mbetur të lënduar 14 vajza dhe tre meshkuj.
Policia e Kosovës në raportin 24-orësh ka bërë të ditur se katër të dyshuarit kanë mbetur të hospitalizuar në QKUK, dhe me vendim të prokurorit ndalohen nën përkujdesjen e policisë.
Ngjarja dyshohet se ka ndodhur pas një mosmarrëveshje mes disa personave në rrugën “Xheladin Hana”.
Njësitë relevante të Policisë së Kosovës dhe njësia K-9 kanë dalë në vendin e ngjarjes, ku kanë gjetur katër gëzhoja dhe njolla gjaku.
Lidhur me këtë rast raportohet se një i dyshuar është në arrati./teve1.info/
