Shkupi, nuk do ta ketë përkrahjen e tifozëve në ndeshjen e kthimit ndaj Levski Sofia. Në ndeshjen e parë e zhvilluar të enjten në Shkup përfundoi me fitoren 2:0 të skuadrës bullgare, ka pasur incidente të rënda mes tifozëve dhe është vendosur që përkrahësit e Shkupit mos të udhëtojnë për në kryeqendrën bullgare.
Këtë e ka bërë të ditur klubi shkupjan të hënën. Ndeshja e kthimit zhvillohet të enjten prej orës 19:00 në Sofje.
“Sot është mbajtur një takim mes zyrtarëve të klubit tonë, përfaqësuesve të UEFA-s dhe pjesëtarëve të Ministrisë së Punëve të Brendshme të Maqedonisë së Veriut. Edhe një herë është konfirmuar se nuk do të ketë dhe nuk do të lejohet udhëtim i tifozëve tanë për në Sofje të Bullgarisë për ndeshjen e kthimit kundër Levskit.
Nuk do të lejohet asnjë tifoz i vendit tonë edhe nëse do të ketë biletë për ndeshje. Në hyrje do të kërkohet dokument identifikimi, ndërsa nuk do të ketë asnjë sektor të ndarë për tifozët mysafirë. Ky lajm i është kumtuar edhe kryesisë së tifo-grupit ‘Shvercerat’, të cilët tani më janë në dijeni se udhëtimi nuk do të jetë i mundur. Andaj, edhe një herë apelojmë që të mos udhëtohet në asnjë mënyrë drejt Sofjes”, ka njoftuar FC Shkupi.
Para ndeshjes në Shkup, ka pasur përleshje mes tifozëve të Shkupit dhe atyre të Levskit, derisa ka pasur të lënduar e shumë të arrestuar. Nga Bullgaria nuk është garantuar siguri për tifozët e Shkupit, duke paralajmëruar incidente të reja nëse “Shvercerat” do të udhëtojnë për në Sofje.
