Ministri i Financave, Hekuran Murati, deklaroi se ka qenë zotim i qeverisë dhe kërkesë e pensionistëve, që të hiqen 15 vitet si kriter për të përfituar pensione.
Murati në Kuvendin e Kosovës tha se në bazë të përllogaritjeve që janë bërë parashihet që në skemën parciale të kalojnë rreth 70 mijë persona.
“Në bazë të përllogaritjes që kemi bërë parashihet që në skemën parciale të kalojnë rreth 70 mijë persona. Periudha nga largimi nga puna konsiderohet si periudhë e punës për hir të njohjes së kontributit 15-vjeçar. Si impakt buxhetor vlerësohet të jetë diku 60 milionë euro në vit. Është e nevojshme të bëhet edhe llogaritja e kostove për 50 vite. Dhe kostoja ka dalë të jetë rreth 1.3 miliard euro për këto 50 vite”, tha ai.
Teksa theksoi se “me ligjin e ri për pensione njëherë e përgjithmonë hiqet diskriminimi ndaj pensionistëve të Kosovës”.
Ndryshe, në këtë seancë janë dy pika në rend të ditës, shqyrtimi i parë i Projektligjit nr. 08/L-248 për ndryshimin dhe plotësimin e Ligjit nr.04/L131 për Skemat pensionale të financuara nga shteti dhe shqyrtimi i parë i Projektligjit nr.08/L-239 për ndryshimin dhe plotësimin e Ligjit nr.06/L-114 për zyrtarët publikë, i ndryshuar dhe plotësuar me Ligjin nr.08/L-128.
