Ish i burgosuri politik, Xhevat Bislimi tha se veprimtari, Adem Demaçi i ka kaluar përmasat e kombit shqiptar sidomos pas viteve 90-ta, kur edhe është bërë një personalitet evropian e botëror. Bislimi madje theksoi se Demaçi është personaliteti i cili me veprimtarinë dhe qëndresën e tij politike kundër pushtuesit serb, u bë flamuri dhe simboli të cilin e ndoqi rinia e Kosovës. Këtë vlerësim Bislimi i dha në pesëvjetorin e vdekjes së Demaçit.
“Është personalitet që me veprimtarinë e tij, me krijimtarinë e tij letrare, dhe qëndresën e tij mbi të gjitha, u bë flamuri ynë, u bë qëndrestari ynë, simboli ynë, të cilin e ndoqi rinia e Kosovës. Ndoshta populli shqiptar, lëvizja jonë kombëtare, te emri i tij, te figura e tij, te vepra e tij, e gjeti simbolin pas të cilit shkoi dhe ai emër u bë emër si të thuash në një mënyrë i dashur për të gjithë rininë shqiptare, emër shpresëdhënës”, tha ai në emisionin “Ditari” në Tëvë1.
Teksa shtoi se “Adem Demaçi është prej figurave më të rëndësishme të lëvizjes tonë kombëtare dhe e popullit shqiptar, jo vetëm në trojet e pushtuara, por kudo ku ka shqiptar”.
Demaçi ishte autor i disa librave: Fërkime, Gjarpijtë e gjakut, Libër për Vet Mohimin, Heli e Mimoza, Nëna Shegë e pesë gocat, Shkrumbnajë e dashur, Dashuria Kuantike e Filanit, Alb Prometeu, Politika, Pushka dhe Tung vargu im. Ai ka vdekur më 26 korrik të vitit 2018-të.
Ndryshe, në pesë vjetorin e vdekjes së tij, kryeministri Albin Kurti bashkë me kryetarin e Kuvendit Glauk Konjufca dhe bashkëpunëtorë të tjerë kanë bërë homazhe tek varri i Demaçit.
Kurti, ka thënë se veprimtari i çështjes kombëtare, Adem Demaçi ka qenë një figurë e jashtëzakonshme dhe unike e kombit shqiptarë./teve1.info./
