Këshilli Gjyqësor i Kosovës i ka autorizuar kryetarët e Gjykatave në Pallatin e Drejtësisë që varësisht nga gjendja në këtë objekt, të marrin masa për reduktimin e punës, si shkak i temperaturave të larta, raporton teve1.info
Përmes një njoftimi në Facebook, KGJK ka bërë të ditur se ky vendim është marrë në një takim të jashtëzakonshëm, i cili është mbajtur si pasojë e mungesës së sistemit të klimatizimit të objektin e Pallatit të Drejtësisë në Prishtinë.
“Takimi i jashtëzakonshëm i Këshillit është mbajtur me qëllim të diskutimit lidhur me situatën e krijuar në Pallatin e Drejtësisë, si pasojë e mos funksionimit të sistemit të klimatizimit dhe rritjes së temperaturës në ambientet e punës deri në 35 gradë celsius. Në këtë situatë, gjyqtarët dhe punonjësit e Gjykatës Supreme, Dhomës së Posaçme të Gjykatës Supreme, Gjykatës së Apelit, Gjykatës Komerciale dhe Gjykatës Themelore të Prishtinës janë duke punuar në kushte alarmante të punës, si rezultat i mos funksionimit të sistemit të ajrosjes në Pallatin e Drejtësisë.
KGJK dhe kryetarët e gjykatave që punojnë në Pallatin e Drejtësisë, me datë 24 korrik 2023, i’u drejtuan me letër të hapur: Kryeministrit të Republikës së Kosovës z. Albin Kurti, Zëvendës Kryeministrit, z. Besnik Bislimi, Ministrit të Punëve të Brendshme dhe Administratës Publike, z. Xhelal Sveçla, Ministres së Drejtësisë, znj. Albulena Haxhiu dhe Ministrit të Financave, Punës dhe Transfereve, z. Hekuran Murati”, thuhet në reagimin e tyre.
