Kërkohet nga qytetarët ruajtja e zonës natyrore
Nën hijet e pishave zgjodhën të pushojnë gjatë së hënës.
E vizitorë të tjerë po kalojnë kohë duke ecur në rrugicat e parkut.
Hapësirë për rekreacion ka edhe për fëmijët.
Por, Parku i Pishave në Sllatinë të Fushë Kosovës, ndonëse po tërheqë vëmendjen e vizitorëve çdo herë e më shumë, mirëmbajtja e tij nuk është në nivel të duhur.
Për këtë, qytetarët i fajësojnë vet vizitorët për moskujdesin ndaj kësaj zone.
“Vikendeve e shfrytëzojmë shumicën e rasteve, pushimeve verore zakonisht, po s’po hiqet ky problemi i mbeturinave – është pengesë – edhe ndotje edhe vet n’pamje po tregojmë një jo kulturë të mjaftueshme”, tha Naim Lahu, banor i Prishtinës.
Sipas tyre, vizitorët po i hedhin mbeturinat vend e pa vend.
“Po mundohen ta pastrojnë, por s’po mund t’ia dalin. Një herë në javë e pastrojnë, çka të bëjmë. Edhe ne kulturë nuk kemi, i gjuajmë mbeturinat kudo e ngado. Është vendi për me i gjuajt, nuk i gjuan aty, por i lë aty ku rri, pak edhe fajtorë jemi vet populli”, tha Musfatë Tërmkolli.
Por sipas komunës së Fushë Kosovës, pastrimi i këtij ambienti pritet të shpeshtohet.
“Çdo të martë ekipet tona shkojnë dhe i heqin mbeturinat. Jemi në diskutim dhe shqyrtim e sipër që ta shtojmë prezencën tonë, ta bëjmë brenda javës dy herë dhe kjo sigurisht do të ndodhë shumë shpejt”, zëdhënësi i Komunës së Fushë-Kosovës, Ali Topalli.
Megjithatë ky nuk është problemi i vetëm me të cilin përballet kjo komunë sa i përket Parkut të Pishave.
“Sistemi i ndriçimit po i prishin shtyllat po i dëmtojnë vet qytetarët që shkojnë atje, ashtu siç po i dëmtojnë edhe ulëset. Ripërsërisim kërkesën tonë dhe apelin tonë edhe tek qytetarët që të jenë më të vëmendshëm, më të kujdesshëm”, tha Topalli.
Parku i Pishave në Sllatinë sipas komunës së Fushë Kosovës këtë vit po frekuentohet më shumë nga vizitorët, të cilët po e cilësojnë si ambient atraktiv dhe të nevojshëm për shëndetin.
