Analisti, Visar Xani takimet e sotme dypalëshe të mbajtura në Bruksel mes Emisarit të BE-së për dialogun, Miroslav Lajçak dhe dy kryenegociatorëve, Besnik Bislimi e Petar Petkoviç në Bruksel i ka vlerësuar si një rikthim të situatës në tavolinën e bisedimeve.
Xani në emisionin “Këndi i Debatit” në Tëvë1, theksoi se ka sinjale pozitive për rezultate në bisedimet mes të dyja vendeve, por që sipas tij, pavarësisht kësaj situate mund të tensionohet varësisht prej kalkulimeve të Beogradit.
“Kemi rikthim të situatës, rikthim në tryezën e bisedimeve dhe me shpresën se do të ketë në binarë të dialogimit, për shkak se çdo ndërprerje dhe tensionim nuk ka asnjë kuptim që të vazhdohet diçka tutje dhe të presim rezultate. Patjetër që sinjalet duket që janë pak a shumë pozitive për qetësim të situatës, por assesi nuk kemi garanci për shkak se varësisht prej kalkulimeve të Beogradit situata del lehtësisht nga dora, sidomos nëse e kemi pa kohëve të fundit që ka qenë një gjuhë më e butë karshi Beogradit nga faktori ndërkombëtarë. Dhe kjo i ka jep liri Beogradit të kalkulojë politikisht dhe të provojë, pra të ngritë tensionet në veri”, tha ai.
Sipas analistit politik, edhe pse për momentin gjendja në veri të vendit është e qetë, ai tha se nëse në të ardhmen e afërt nuk do të ketë rezultate pozitive në dialog, situate mund të kthehet në pikën zero.
“Edhe pse kemi një qetësi në pjesën veriore nuk do të thotë që do të mund të kemi një zgjatje të pafundshme nëse nuk kemi rezultate shumë të shpejta në dialog. Atëherë mund të kemi rikthim të situatës shumë më lehtë sesa një marrëveshje”, shtoi ai.
Kurse, emisari i Bashkimit Evropian për dialogun Kosovë-Serbi, Miroslav Lajçak pas takimeve ka deklaruar se me kryenegociatorin e Kosovës, Besnik Bislimin dhe atë serb, Petar Petkoviq, kanë diskutuar një listë të gjatë të çështjeve të dialogut. Por që sipas tij, diskutimet do të vazhdojnë edhe në periudhën e ardhshme./teve1.info./
Bislimi: Plani i BE-së u kushton më shumë vëmendje kërkesave të Serbisë
