Pesë persona janë lënduar në një aksident trafiku në Prishtinë ku është përfshirë edhe vetura e deputetes së Lëvizjes Vetëvendosje, Tinka Kurti.
Pas aksidentit, deputetja Vetëvendosje ka sqaruar se me të kanë qenë edhe fëmijët dhe gjyshi. Ajo tha se bashkë me familjarët e saj janë mirë.
”Familjarë e miq që jeni shqetësu sot nga lajmi i aksidentimit, fëmijët, gjyshi dhe unë jemi mirë. Shpëtuam fatbardhësisht. Ju falenderoj shumë për kujdesin! E paçit shëndetin“, ka shkruar ajo në Facebook.
Lajmin për aksidentin e ka konfirmuar për teve1.info zëdhënësja e Policisë për rajonin e Prishtinës, Flora Ahmeti.
“Rreth orës 17:00 kemi pranuar informatën se në rrugën ‘Bedrush Çollaku’ në Prishtinë, ka ndodhur një aksident trafiku me lëndime. Në këtë aksident kanë qenë të përfshira dy automjete. Si pasojë e aksidentit lëndime trupore kanë pësuar pesë persona. Me rastin po merret njësiti i trafikut”, thuhet në përgjigjen e Policisë.