Deputeti i LDK-së, Armend Zemaj e ka quajtur skandaloz, të dëmshëm dhe të papranueshëm vendimin e Ministrisë së Shëndetësisë për pezullimin e operacioneve të planifikuara në Spitalin e Gjakovës përgjatë stinës së verës, raporton teve1.info
Zemaj i cili e ka publikuar edhe vendimin e ministrit të Shëndetësisë, Arben Vitia, ka thënë se një ditë më parë në Komisionin parlamentar për Shëndetësi partia në pushtet u zotua se do ta eliminojë listën e pritjes nëpër spitale, ndërsa një ditë më vonë e publikon një vendim për pezullimin e këtij shërbimi në Gjakovë.
“O ministër i shëndetësisë, a je gjallë?
A mos ke dhënë prapë dorëheqje?
Nëse po, a kthehesh prapë ministër?
Nëse jo, a je ministër edhe kur janë temperaturat e larta?
A do të jesh ministër edhe kur të jenë temperaturat e ulëta?
Ku je ministër i vendimeve që e dëmtojnë shëndetin dhe nuk ofrojnë shërbime për pacientët?
Vendimi i Spitalit të Përgjithshëm “Isa Grezda” në Gjakovë, për ndalimin e operacioneve – programit të ftohtë gjatë muajve te verës është i papranueshëm, i dëmshëm; është skandaloz.
Një vendim i tillë është për keqardhje për një shoqëri që problemin më të madh e ka mbijetesën, mirëqenien dhe qasjen minimale për shërbime shëndetësore.
Hiq më larg se dje, në Komisionin për Shëndetësi dhe Mirëqenie Sociale adresuam problemet e shumta, ku njëra ndër to ishte edhe lista e gjatë e pritjes për të marrë shërbimet shëndetësore. E zotimi i pushtetit ishte që do të angazhohen në këtë drejtim, ndërsa nuk vonon shumë Spitali i Gjakovës, që është nën menaxhim të pushtetit merr një vendim krejt të kundërt nga zotimi i udhëheqësve të tyre.
Përgjegjësia politike e ministrit të shëndetësisë është e pakontestueshme.