Asociacioni i Gazetarëve të Kosovës ka njoftuar se kameramani i gazetës online “Nacionale”, Arbër Latifi, është sulmuar fizikisht të mërkurën në afërsi të Spitalit të Gjakovës nga pjesëtari i sigurimit të këtij spitali.
Sipas AGK-së, Latifi së bashku me gazetaren, Gentiana Hasani, kishin shkuar në Spitalin e Gjakovës për të raportuar rreth ndërprerjes së të gjitha operacioneve që ishte bërë me arsyetimin e temperaturave të larta.
“Sipas raportimeve të Nacionales, kolegët kanë marrë ndihmë mjekësore dhe gjithashtu ka dhënë deklaratë në Policinë e Kosovës. Njëherësh, bëhet e ditur se pjesëtari i sigurimit që e ka kryer këtë sulm është ndaluar për 48 orë”, thuhet në reagimin e AGK-së.
Asociacioni i Gazetarëve të Kosovës shprehet tejet i shqetësuar me sulmin fizik ndaj ekipit të Nacionales, dhe u bën thirrje organeve të drejtësisë ta trajtojnë me prioritet rastin.
