Presidentja e Kosovës, Vjosa Osmani e ka kujtuar masakrën e Rahovecit, ku u vranë mbi 150 civil të pafajshëm, në mesin e të cilëve gra, fëmijë e pleq, raporton teve1.info
Përmes një postimi në faqen e Presidencës në Facebook, thuhet se presidentja Osmani përveç përkujtimit të të kaluarës, ka bërë thirrje për drejtësi.
“Më 19 korrik të vitit 1998, forcat e regjimit gjenocidal të Serbisë vranë mizorisht afro 150 gra, fëmijë e pleq, të strehuar në Teqen e Sheh Myhedinit në Rahovec, sikurse edhe në vendin e quajtur “Tuma”.
Përkujtimi i sotëm nuk është vetëm një mundësi për ta kujtuar këtë ditë të trishtë, për ta kujtuar të kaluarën dhe për t`i nderuar viktimat, por mbi të gjitha është thirrje për drejtësi.
Kujtimi për jetët e humbura e të pafajshme do të jetë i përhershëm, teksa zëri ynë për drejtësi do të kumbojë, deri në triumfin e saj!”, thuhet në njoftimin e Presidencës.