Një zyrtar i Agjencisë së Regjistrimit Civil të Kosovës, përgjegjës për aplikim dhe shpërndarje të dokumenteve personale është ndaluar nga Policia, pasi ka lëshuar dokumente fals, raporton teve1.info
Sipas komunikatës së Prokurorisë Themelore në Prishtinë, i dyshuari me inicialet D.B., në këmbim të parave i ka lëshuar dokumente me të dhënat e dikujt tjetër shtetasit të Shqipërisë me inicialet M.D., i cili ishte në kërkim ndërkombëtar.
Rasti sipas Prokurorisë ka ndodhur në tetor të vitit 2021, ndërsa i dyshuari të mërkurën është ndaluar nga policia me vendim të prokurorit.
“I lartcekuri dyshohet se më 15.10.2021, në Prishtinë, respektivisht në zyrat e Agjencisë për Regjistrim Civil (ARC), në cilësinë e zyrtarit administrativ pranë kësaj Agjencie, përgjegjës për aplikim dhe shpërndarjen e dokumenteve personale (letërnjoftim, patentë shoferë dhe pasaportë), me qëllim të përfitimit të dobisë pasurore për vete apo për tjetrin, me dashje dhe dijeni, i ka keqpërdorur autorizimet e tija ligjore, duke vepruar në kundërshtim me legjislacionin për dokumentet personale, në atë mënyrë që, personit me inicialet M.D., shtetas i Republikës së Shqipërisë, i shpallur në kërkim ndërkombëtar nga Interpoli për vepra penale të narkotikëve, i sjellë dobi të kundërligjshme duke i ndihmuar që ta kompletojë, pranojë dhe vërtetojë dokumentacionin personal në emër dhe me të dhënat e të dëmtuarit A.N., kështu duke i mundësuar personit M.D., që të nxjerrë letërnjoftimin dhe pasaportën e Republikës së Kosovës me të dhënat e të dëmtuarit A.N”, thuhet në komunikatë.
Sipas njoftimit, prokurori i Shtetit, lidhur me këtë çështje penale, në koordinim me Policinë është duke i ndërmarrë të gjitha veprimet e nevojshme hetimore me qëllim të luftimit të këtyre raste të cilat kohëve të fundit janë në rritje e sipër.