Drejtori ekzekutiv në Institutin për Politika Sociale “Musine Kokalari”, Belgzim Kamberi, thotë se “konflikti” mes kryeministrit të Kosovës, Albin Kurti dhe atij të Shqipërisë, Edi Rama, po ushqehet nga “palët e treta”, e që sipas tij janë të panevojshme.
Kamberi, thotë se nga “palët e treta”, opozitarët e Ramës në Shqipëri në luftën ndaj tij kanë përpjeke ta përdorin Kurtin, ndërsa edhe opozitarët e Kurtit kundër tij kanë përpjeke ta përdorin Ramën.
“Po ushqehet shumë ky konflikt edhe nga ‘palët e treta’ të panevojshme, kryesisht është shndërruar një situatë që opozitarët e Ramës në Shqipëri kanë përpjekje ta përdorin Kurtin në luftën e tyre ndaj Ramës, ndërkaq shpeshherë opozitarët e Kurtit në Kosovë kanë përpjekje ta përdorin Ramën kundër Kurtit në Kosovë”, tha ai në emisionin “InfoNata” në Tëvë1.
Sipas tij, kjo situatë nuk është e dobishme për të dyja shtetet, sepse zbehtë raportet.
“Kjo mendoj që nuk është e dobishme, sepse po e zbehë edhe vetë përmbajtjen dhe raportet, por nuk po është as produktive, po përfundon në një betejë militantësh, e cila vërtetë është betejë për pushtet dhe për një pushtet të cekët, fatkeqësisht nuk ka diskutim përmbajtjesor, sepse edhe ‘Open Ballkan’ dhe për tema të tjera nuk është që është bërë ndonjë diskutim shumë përmbajtjesor”, tha Kamberi.
“Më shumë janë ‘kurtianët’ dhe ‘ramistët’ që luftojnë mes vete kështu, në të dyja hapësirat shqiptare”, shtoi ai.
