Kongresisti amerikan, Keith Self i ka parashtruar disa pyetje emisarit të Shteteve të Bashkuara të Amerikës, Gabriel Escobar, mbi qasjen e tij ndaj Kosovës.
Në Komitetin për Punë të Jashtme të Dhomës së Përfaqësuesve në ShBA, Self ka thënë se Escobari po tregohet jokonsistent me deklaratat e tij. Self gjithashtu ka pyetur Escobarin se pse nuk po sanksionohet Serbia.
“Dëgjoj një lloj jonkonsistence, keni qenë në anën e Kosovës në çdo moment. Kështu thatë. Por, që tani po shohim një qasje më të balancuar. Por nuk ka dyshim që Vuçiqi ka nxitur bojkotimin e zgjedhjeve të Kosovës, nuk ka kurrfarë dyshimi në këtë. Në diçka nuk jam shumë i sigurt, më duket se Serbia i ka vonuar pak zgjedhjet e veta për shkak të zgjedhjeve në Kosovë. Kjo nuk është Ukraina, por është në kufi të NATO-s. Serbia dhe Rusia janë të rrethuara nga shtetet e NATO-s dhe kjo mund të jetë më shumë rrezik në kuptimin e përhapjes së dhunës. Nuk jam fort i qartë pse nuk kemi sanksione ndaj Serbisë sot sepse kanë importuar armatim të rëndë nga Rusia që nga viti 2017, që është dashur të çonte drejt sanksioneve në kuptimin e luftimeve të kundërshtarëve të Amerikës me anë të sanksioneve në 2017. Po ju pyes juve pse jo?”, është shprehur Self.
Escobar ka thënë se sanksionet për armatimin e shteteve funksionojnë ndryshe dhe për këtë SHBA-ja është në komunikim me shtetin serb.
“Nuk është zyra ime që merret me sanksionet. Sanksionet nuk kanë të bëjnë vetëm me blerjen e armatimit rus, po të ishte kështu do të kishim probleme edhe me Turqinë dhe të tjerët. Është niveli i blerjeve dhe kapaciteteve teknologjike të këtyre blerjeve. Për këtë kemi vazhduar komunikimin me Serbinë”, është përgjigjur Escobar.
