Historiani, Bejtullah Destani ka folur për raportet që diktatori komunist, Enver Hoxha kishte me Shtetet e Bashkuara të Amerikës.
Destani thotë se në fillim Hoxha takohej me zyrtarë amerikanë, porse ata ishin të njoftuar me aktivitet në terren të Lëvizjes Nacional-Çlirimtare.
“Këta kanë pasur, i kanë takuar zyrtarët amerikanë dhe është letra interesante që në 1945 Enver Hoxha, përmes Kadri Hoxhës e jep për presidentin Ruzvelt, për njohjen e Shqipërisë me shkrim. Natyrisht Amerika nuk ia kthen asnjëherë se gjatë luftës këta filluan të bëjnë vrasje. Amerikanët ishin në dijeni për aktivitetin e Lëvizjes Nacional-Çlirimtare se çfarë po bëjnë në terren”, ka thënë Destani.
Krisja më e madhe dhe definitive të raporteve të ShBA-së me Shqipërinë në kohën e Hoxhës, Destani thotë se ishte vrasja e disa inxhinierëve amerikanë që kishin ardhur në Shqipëri nga regjimi komunist.
“Po ma e fuqishme është periudha kur në Liqenin e Maliqit dërguan amerikanët ca inxhinierë që ta ndihmojnë Shqipërinë. Qeveria e Enver Hoxhës vendos që t’i burgosë të gjithë ata edhe i pushkaton një pjesë të madhe të tyre. Aty është fillimi i fundit të marrëdhënieve me Shqipërinë. Amerikanët vendosin të tërhiqen se e kanë pa që rruga në të cilën shkon Qeveria shqiptare është shumë e keqe. Ata nuk kishin më simpati që ta mbrojnë”, ka shtuar Destani.
Sipas tij, Hoxha nuk e përmendte Kosovën në letrat e tij me amerikanët, porse në atë kohë avokuesit më të mëdhenj për Kosovën ishin përfaqësuesit e Ballit Kombëtar.
“Në raport me amerikanët nuk ka kurrfarë letre që e përmend Kosovën. Kosovën të vetmit që e përmendin janë përfaqësuesit e Ballit Kombëtar, ata e kanë përmend shumë herë. Sidomos Mit’hat Frashëri i cili e ka dashtë Kosovën, ka shkruar shumë letra dhe e ka përkrahë Kosovën sidomos gjatë Luftës së Dytë Botërore. Por aktiviteti i tij për Kosovën vazhdon edhe pas Luftës së Dytë Botërore”, rrëfen ai.
