Ish-diplomati, Tomorr Avdia ka komentuar mospjesëmarrjen e asnjë zyrtari të lartë politik të Kosovës në takimin joformal në Tiranë, me liderët e vendeve të Ballkanit Perëndimor.
Sipas Avdiajt, në këtë takim Qeveria e Kosovës ka provuar ta dërgojë zëvendëskryeministrin Bislimi, por për këtë nuk ka pasur dakordim të Qeverisë në Tiranë.
“Në qoftë se , në momentin kur është parë agjenda e Kurtit që është e pamundshme, atëherë në ato çfarë ne kemi parë, diskutuar dhe informuar, është që duket që ka pasur aty përplasje për këtë lloj agjende informale, për arsye sepse është insistuar dhe kanë qenë pjesëmarrës kryeministrat në këtë takim. Dhe në këtë rast Qeveria e Kosovës duhet dhe ka tentuar që zëvendësimin e Kurtit ta bëjë me Bislimin por në bazë të informacioneve duket që nuk ka pasur një dakordancë nga ana e Qeverisë së Ramës”, ka thënë Avdia në Ditari në Tëvë 1.
Sipas Avdiajt është shumë e rëndësishme që Kosova të marrë pjesë në këto forume, veç të tjerash, edhe duke pasur parasysh mbështetjen që kryeministri Kurti e ka për Procesin e Berlinit.
“Tani kjo ka shkaktuar këtë lloj fërkimi që e ka zbehur këtë takim dhe këtë pjesëmarrje pasi është shumë e rëndësishme që Kosova të jetë pjesë e këtyre forumeve për vet formatin e saj, për vet rrethanat që po kalon Kosova. Edhe për interesin e saj sepse një shtet i ri kur është në njohje, në formim, rritjen e formatit të vet përfaqësues, është shumë e rëndësishme që të marrë pjesë në çdo lloj takimi dhe formati. Pasi Procesi i Berlinit është proces për të cilin kryeministri Kurti ka punuar, lobuar dhe mbështetur fortë edhe në opozitë edhe në pushtet”, ka thënë Avdia.