Edhe java e ardhshme do të jetë me mot të nxehtë dhe temperatura të larta.
Dita e parë e javës do të jetë kryesisht me diell me temperaturat maksimale deri në 36 gradë Celsius.
Temperatura të ngjashme do të jenë edhe të martën.
Ndërsa dita e më e nxehtë gjatë javës do të jetë e mërkura, njofton Instituti Hidrometeorologjik i Kosovës.
“Mot kryesisht me diell. Temperaturat minimale parashihen të lëvizin ndërmjet 15-19 gradë Celsius, ndërsa maksimalet e ditës parashihen të lëvizin ndërmjet 33- 37 gradë Celsius”, thuhet në njoftim.
Sipas institutit të enjten dhe të premten do të ketë rënie të lehtë të temperaturave me maksimalet deri në 35 gradë.
Gjatë kësaj periudhe kohore të parashikimit do të fryjë erë e lehtë deri mesatare nga drejtimi i verilindjes dhe veriperëndimit.
Në shumë vende urbane prezenca e këtyre masave të ajrit do të krijoj mundësi që temperaturat të arrijnë deri 40 gradë Celsius.
Edhe vikendi parashihet të jetë me temperatura ekstremisht të larta.
Ky mot me këto temperatura ekstreme të larta është si rezultat i ardhjes së masave të nxehta të ajrit nga Afrika Veriore.
IHMK ka bërë thirrje për kujdes gjatë këtyre ditëve.
“Meqë indeksi UV do të jetë shumë i lartë ,rekomandohet që të kufizohemi sa më shum nga rrezet e diellit,nga ora 10-17,sidomos personat me sëmundje kronike, hipertension , diabetikët, asmatikët etje, të bartim syze mbrojtese nga rrezet e diellit, ombrellë, rroba me ngjyra të lehta,krema adekuate për mbrojtjen e lëkurës, pastaj të pijmë ujë sa më shpesh, jo lëngje të gazuara, të konsumojmë pemë e perime dhe ushqim me sa më pak yndyrë, etj”, thuhet në njoftim./teve1.info/
