Sot në Hagë në Dhomat e Specializuara të Kosovës, vazhdon gjykimi ndaj Thaçit dhe të tjerëve si dhe vazhdon dëshminë Rrustem Mustafa, ish-komandant i Zonës Operative të Llapit.
Në gjykimin Thaçi dhe të tjerët, Mustafa ka folur për qendrat e ndalimit të UÇK-së në këtë zonë.
Fillimisht dëshmitari tha se ‘‘po, kemi përfunduar një proces gjyqësor për këtë dhe mund ta merrni, ka qenë proces i udhëhequr kundër nesh’’, kur u pyet nga prokurorja Clare Lawson nëse në zonën operative të Llapit kishte njerëz të ndaluar nga UÇK-ja, raporton “Betimi për Drejtësi”.
Tutje ai tha se këta kanë qenë njerëz që binin ndesh me rregullat të luftës dhe nuk kanë qenë të interesuar për etnicitet.
“Meqë po pyetni, ka mund të ketë serb, shqiptar, nuk jam i sigurt për të tjerët, por qytetarë të vendit tonë”, tha ai.
Këta persona sipas tij ishin njerëz që kundërshtonin misionin e UÇK-së dhe se në përgjithësi numri i të ndaluarve nuk kalon numrin treshifror.
Mustafa më tej tha se tek njësia brigada 151, 152 dhe komanda e zonës ka mund të ketë një shtëpi ndalimi, tutje përmendi edhe vendet Bradash, Llapashticë, Buric, Patok, Majac dhe Bajgorë.
Të pranishëm dje në sallën e gjyqit kanë qenë të gjithë të akuzuarit, Thaçi, Veseli, Selimi dhe Krasniqi.
