Minatorët e Ndërmarrjes Trepça janë futur në grevë të mërkurën për shkak të mosekzekutimit të pagës për muajin qershor, raporton teve1.info
Lajmin për teve1.info e konfirmoi kryetari i Sindikatës së minatorëve Brahim Jonuzi, i cili tha se Sindikata nuk e ka organizuar grevën por se i mbështet minatorët në të gjitha kërkesat e tyre, pasi sipas tij janë të drejta dhe ligjore.
“Ne nuk e kemi organizuar grevën por i mbështesim minatorët në të gjitha kërkesat e tyre e që janë, ekzekutimi i pagës për muajin qershor, shlyerja e borxheve në Trust të cilat nuk janë paguar tash e disa muaj si dhe krijimi i kushteve të punës. Punonjësit e ndërrimit të parë të gjithë kanë hyrë në grevë, derisa greva pritet të vazhdoj edhe në ndërrimin e dytë që e fillon punën prej orës 3:00 dhe greva nuk do të ndërpritet deri në realizimin plotë të kërkesave tona”, tha Jonuzi.
I pyetur nëse është njoftuar menaxhmenti me këtë grevë, Jonuzi tha se greva është filluar nga vet minatorët, nuk ka qenë e organizuar derisa shtoi se Sindikata nuk ka marrëdhënie të mira me menaxhmentin, gjë që nuk kanë komunikuar mes vete.
Jonuzi tha se fillimin e grevës ia kanë kumtuar Bordit të Ndërmarrjes.
Kurse sa i përket arsyes së mosekzekutimit të pagave për muajin qershor, Brahimi tha se si arsye u është dhënë mungesa e mjeteve buxhetore.