Ministrja e Drejtësisë, Albulena Haxhiu thotë se përgjimet e publikuara në të cilat është e përfshirë shefja e Grupit Parlamentar të Lëvizjes Vetëvendosje, Mimoza Kusari-Lila, duke biseduar me ish-deputetin nga Lista Serbe, Sllavko Simiq, duhet të hetohen nga institucionet e sigurisë.
Sipas saj, këto përgjime janë të prera dhe të paautorizuara.
“Kusari-Lila e ka sqaruar edhe mbrëmë në tërësi tendencën për të shpërfaq një komunikim që ishte i prerë, i redaktuar, i montuar sipas tendencave të tyre. Duhet ta kuptoni që Lista Serbe është një parti politike që përfaqëson komunitetin serb në Kuvend, por fatkeqësisht në mënyrën më të keqe të saj. Kusari-Lila e tha se është një incizim i paligjshëm. Institucionet e drejtësisë duhet të merren me këtë pasi përbën vepër penale. Është i paautorizuar, i prerë dhe të gjitha më radhë”, tha ajo në një konferencë për media.
Haxhiu deklaroi se Kusari nuk shantazhohet.
“Ato janë publikuar për një arsye, vetëm sepse efekti i tyre ka qenë zero. Lista Serbe nuk ka mundur ta shantazhojë shefen e GP-së të VV-së. Po të shkonin përpara kërkesat e Listës Serbe, po të koordinoheshin me Kusari-Lilën, ato nuk do të publikoheshin. Prej kohësh kur u bë ky incizim, kemi një sërë veprimesh për shtrirje të sovranitetit. Kusari-Lila në asnjë rrethanë nuk i është bindur kërkesave të Listës Serbe. Kusari nuk ka bërë pazare, nuk shantazhohet, nuk mund të frikësohet nga askush”, ka shtuar Haxhiu.
E pyetur nëse duhet të shkarkohet Kusari-Lila nga pozita që ka në LVV, Haxhiu refuzoi të përgjigjet. /Teve1.info/
